Category: Hanga | Create

Anei aku whakaaro mo te wiki kua pahure ake nei. Aku mihi ki te hunga e noho haumaru ana i tēnei wā.

 

 

E Mahi ana me Ngā Raraunga.

Mauriora ki a tātau. Anei taku rangitaki mo te wiki tuawhā.

Nā runga ano i aku whakawhitiwhiti kōrero me Makaore ko aku kōrero mo taku rangitaki ka whakatakotohia e au ki roto i te kiriata. Anei rā aku kōrero mo te rā tuatoru.

Hui Ataata Kukara

I whai hua tēnei awheawhe. I ako au i ētahi pukenga ā e kite ana au ki hea whakamahi ai. Ko tētahi kaupapa i āhua whakararu ko te koretake o taku rorohiko ki te whakaatu i taku mata. Kāti ake e whāia ana he huarahi whakatika i tēnei wā. Nanakia hoki i taea e māua ko Hinewa te hopu kiritea ma tētahi atu huarahi, ā, e kitea ana i raro iho nei

Mahara Kukara

I tua atu i te whakarite rārangi ingoa hai hoko kai kua kite au i ētahi atu hua i roto i te Mahara Kukara. Ko te hopu kōrero tuhituhi mā  te kāmera me te tuku mā Mahara Kukara e whakakupu i ngā kupu i roto i te whakaahua. E hia taema au e tae ana ki te hui , ā, ka miere au i te mea ka mate au ki te tuhi kōrero mai i ētahi whakaaturanga kua kite au ēngari kua kite huarahi au ki te whakangawari ake.

Maramataka

Kua ngawari ake taku whakarite i aku kaupapa o te wā mā te whai i ngā tohutohu mo te maramataka. Kei te kite hoki au i te hua o ēnei akoranga ki aku kaiako.

Ahakoa he iti nei ēnei whakaaro ehara i te mea kāre e rahi ngā akoranga i mau i āhau. Ko te mea kē, ehara au i te tangata waia ki te tuhituhi i ōku whakaaro he pai ake ki āu kia tuku kiriata au. Koina pea he mahi māku haere ake ai.

Waiho tonu…

Tuatahi ake māku ka mihi ki te kaupapa nei.

He hōu, he hirahira, he mātātaki.

Heoi anō ko tātau tonu ēnei, te hunga whakatenatena i a tātau akonga. Kia puta i o rātau anga, kia tuwhitia te hopo. Kāti ake, ehara au i te kūmara ēngari, tēnei au te aruhe nō Te Urewera ka tuku i aku kōrero mo aku akoranga i te rā nei.

Ka mihi ki te kaikōrero tuatahi o te rā i tuku i ngā kōrero hītori, whakapapa mo tēnei kaupapa. E harakoa ana hoki ki te rongo i ngā whakamārama mo te ingoa Manaiakalani. E tau pai ana te wairua ki te rongo i te whakapapa o tēnei ingoa me te āria e whāia ana. Ahakoa no o tātau uri o Te Moana nui a Kiwa te ingoa, ko te ariā e tau pai ana ki roto i tō tātau ahurea. E kitea ana ōna take, i ōna pānga whānui tonu. He mahi tahi, he matemateaone. E mārama ana hoki te kite ko ngā tamariki kei te karamatamata o ngā whakahaere, o ngā whakaaro katoa. Kāre he kōrero i tua atu.

Ahakoa pūrena te rere o ngā kōrero i te rā nei, ko te nuinga i mau. Ko te rapu i tōna whakatinanatanga ki roto i aku mahi te wero nui. Ēngari i te mea i whai wā mātau ki te whakawhitiwhiti kōrero me ngā mātanga me ētahi atu kaiako, tumuaki  e tau ana ngā whakaaro mā te tārua, mā te whakaharatau ka kitea ngā wāhi e whai hua ēnei mātauranga hōu.

 

He aha aku akoranga kia tukua, kia tohaina atu ki āku ākonga? 

Ehara i te mea he ākonga wāku. Ēngari he maha ngā pukenga hōu kua kite au ka whai hua ki aku kaiako. Ko tētahi kaupapa i ako au, ka whakamahia e au ki roto i aku mahi ko te waihanga i aku kōrero ki roto o Google Docs. Ko taku tauira mo tēnei ko te pikitia kua tapiritia e au. Kua kite huarahi ano au ki te whakaputa whakaaro hai whakahihko i ngā kaiako ki ngā kaupapa huhua ka whāia i tēnei tau. Ko ngā kōrero nei nō tō mātau marau-ā-kura. Heoi ki āu nei ki te tika te whakatakoto. Ki te rata ki te kanohi e mātai ana, ko tōna tumanako ka rikarika te kaipānui ki te pānui.

Ka mutu i whai hua hoki ētahi o ngā kōrero mo te ‘Drive’ inā hoki, ki te kite koe i te whakatakoto o taku rorohiko ka mārama pū koe ki te iho o tēnei kōrero.

I tau taku ako i te rā tuatahi nei. Tēna i te kai, i marū pai ngā hua i hora ki te tēpu. No reira e whakawhetai atu ana ki ngā ringawera o te kaupapa nei. Ehara hoki i te mea he ō manapou te kai i te rā nei. Ēngari i puta ‘te pito o hinengaro’ kua mākona mo tēnei wā. 

Mauriora ki a koutou katoa. Hai tēra wiki.